Вклучи се · ЕВЕЦ Кочани
Сакаш да волонтираш? Еве како се вклучуваш.
Не ти треба искуство, не плаќаш ништо и не мора однапред да знаеш што сакаш да правиш. Тука се сите начини да бидеш дел од ЕВЕЦ — во Кочани, Штип, Струмица, Делчево и Лозово, од дома преку интернет, или во друга европска земја.
Од каде да почнеш
Првото прашање обично не е „како“, туку „дали воопшто важи за мене“.
Важи. Ако си средношколец во Кочани и имаш два слободни часа во неделата — важи. Ако си студент и ти треба вистинско искуство, а не уште еден сертификат од семинар — важи. Ако си далеку и можеш да помогнеш само од компјутер — и тоа важи. Подолу се четири различни патишта и барем еден од нив е отворен за тебе уште денес.
Главниот чекор
Што можеш да правиш кај нас.
Четири патишта плус една врата за оние што не знаат што да изберат. Секој пат си има своја страница со подробностите.
Локално волонтирање
Помагаш на терен — еколошки акции, работилници во училиштата, боча (Boccia), улични кампањи и настани во Кочани и во градовите каде што имаме подружници. Ова е најбрзиот начин да почнеш: без рокови, без конкурс.
За секој што е во Кочани, Штип, Струмица, Делчево или Лозово. Нема горна возрасна граница; до 18 години се оди со согласност од родител. Види локално волонтирање →Онлајн волонтирање
Помагаш од дома, во време што ти одговара — текстови, дизајн, социјални мрежи, монтажа, превод. Ако си од Кочани, а студираш во Скопје или си во странство, ова е начинот да останеш дел од екипата.
За секого, каде и да си. Доволни се неколку часа неделно. Види онлајн волонтирање → Плаќа Европската унијаЕвропски солидарен корпус — волонтирање во странство
Волонтерски престој во друга европска земја, од 14 дена до 12 месеци. Патот, сместувањето, храната и месечен џепарлак ги покрива Европската унија, а на самото место имаш ментор. Ти не плаќаш ништо и не ти треба стипендија од факултет.
ЕВЕЦ ја има Ознаката за квалитет како организација домаќин и како организација за поддршка, што значи дека може да те придружува како организација што те испраќа. Истото важи и обратно — ознаката ја носи здружението, па може да примиме волонтери од Европа во сите пет града (Кочани, Штип, Струмица, Делчево и Лозово); тоа кај нас сè уште не се случило.
Од 18 до 30 години, со законски престој во земја што учествува во програмата. Северна Македонија е една од нив. Види што е Европски солидарен корпус →Пракса во Кочани
Ако студираш во Македонија, може да дојдеш на пракса кај нас — самофинансирано или преку практична настава договорена со факултетот. Ако те испраќа установа од друга земја, праксата ти ја финансира таа установа преку Еразмус+; мобилноста преку Еразмус+ не може да се одвива во сопствената земја, па за студент од Македонија стипендија од Еразмус+ за пракса во Кочани нема. Ако пак сакаш пракса во странство, тоа оди преку Еразмус+ координаторот на твојот факултет, не преку нас — но слободно прашај нè како изгледа тоа однатре.
За студенти од Македонија и за студенти што ги испраќа установа од странство. Види пракса →Не си сигурен што ти одговара?
Напиши ни во две реченици кој си, од каде си и што те интересира. Ќе ти кажеме што е отворено за тебе, а што не е — без завиткување.
За сите. Одговараме на македонски. Пиши ни →Прашање број еден
Колку чини и кој плаќа што.
Ова е прашањето што најмногу луѓе се срамат да го постават прво, па го оставаат за крај. Затоа тука е горе.
| Начин | Каде | За кого | Пари | Добро е ако |
|---|---|---|---|---|
| Локално волонтирање | Кочани и подружниците | Секоја возраст | Не плаќаш, не примаш | Сакаш да почнеш веднаш, близу дома |
| Онлајн волонтирање | Од дома, каде и да си | Секој | Не плаќаш, не примаш | Немаш време на терен, ама имаш вештина |
| Европски солидарен корпус | Во друга европска земја | 18–30 години | Покриено од ЕУ | Сакаш да живееш и волонтираш во странство → види ЕСК |
| Пракса — студираш во Македонија | Во канцеларијата во Кочани | Студенти во Македонија | Самофинансирано или преку факултет | Ти треба практика што ти се признава на факултет |
| Пракса — доаѓаш од друга земја | Во канцеларијата во Кочани | Студенти од странство | Стипендија од Еразмус+ преку установата што те испраќа | Твојата установа те испраќа на пракса во странство |
ЕВЕЦ не наплаќа ниту денар за волонтирање. Нема членарина, нема „такса за апликација“, нема плаќање за потврда. Ако некој бара пари од тебе за да те „вклучи“ во европски проект — тоа не сме ние и не е нормално.
Другата страна на истата вистина: локалното и онлајн волонтирањето не се платена работа. ЕВЕЦ нема ниту еден платен вработен — сите што работат тука се волонтери. Кај Европскиот солидарен корпус трошоците ги покрива програмата, а не ЕВЕЦ, и висината на џепарлакот ја одредува програмата за секоја земја посебно.
Прашање број два
Дали ми треба англиски?
- За локално волонтирање — не ти треба. Работниот јазик е македонски. Ако дојде група од странство, преводот е наша грижа, не твоја.
- За онлајн волонтирање — зависи од задачата. Има работи што се целосно на македонски (текстови, објави, превод, дизајн), и има работи каде што англискиот помага.
- За Европскиот солидарен корпус — зависи од проектот. Во огласот за секое место стои што бара организацијата домаќин. Нема испит по јазик и никој не бара сертификат за да те „оцени“.
И најважното: пиши ни на македонски. Ние одговараме на македонски. Ниту едно прашање овде не се губи затоа што било поставено на погрешен јазик.
Без разубавување
Каква е работата всушност.
Ова се работите што се случуваат вистински, а не се напишани за да убаво изгледаат на сајт:
- Еколошки акции и еколошки календар со училиштата во Кочани — чистења, садење, работилници низ целата година.
- Боча — параолимпискиот спорт што ЕВЕЦ прв го донесе во Северна Македонија. Тренинзи и натпревари каде што волонтерите се дел од екипата околу теренот.
- Поддршка во дневните центри за лица со попреченост во Штип и Делчево — центрите не се наши, работат многу пред ЕВЕЦ да постои; ние соработуваме со нив.
- Работа за вклучување на младите Роми — работилници, дружење, поддршка околу училиштето.
- Улични кампањи, младински размени и работилници во канцеларијата — од кампања за здрава исхрана до размена со учесници од неколку земји.
Планираме да ги донесеме и методите што нашата мрежа ги разви и ги испроба во Атина — микрозеленчук, мицелиум, дронови и сончева енергија. Тоа во Кочани сè уште не е започнато и не сакаме да пишуваме поинаку: ако дојдеш сега, ќе бидеш од оние што ги градат, а не од оние што доаѓаат на готово.
Ништо од ова не бара претходно знаење. Никој нема да те праша што си учел пред да ти даде метла, топка или маркер.
Чекор по чекор
Како се пријавуваш.
Нема формулар од три страници и нема конкурс со рок. Има кратка пријава или обична порака, па одговор и разговор.
1 · Се пријавуваш или пишуваш
Најбрзо е преку кратката пријава на дното од страницава. Ако повеќе ти одговара, пиши на contact@evec.org.mk, преку страницата за контакт или јави се на 078 275 770. Напиши: како се викаш, од кој град си, колку години имаш, што те интересира и приближно кога си слободен. Четири реченици се сосема доволни.
2 · Одговараме во рок од 3 работни дена
Секоја порака ја чита човек и на неа одговара човек. Ако поминат три работни дена и нема ништо, прати ја пораката повторно — многу поверојатно е дека се загубила, отколку дека сме те прескокнале.
3 · Се слушаме или се гледаме
Краток разговор, во канцеларијата во Кочани, на телефон или онлајн — за да видиме што те интересира и што има во тој момент. Не е испит и нема да бидеш одбиен поради оценки, факултет или биографија.
4 · Почнуваш од првата активност што ти одговара
Кај локалното и онлајн волонтирањето нема чекање на почеток на „сезона“ — влегуваш во првата акција што доаѓа. Кај Европскиот солидарен корпус и кај праксата има поднесување и рокови, па таму се договараме однапред.
5 · Датумите не ги измислуваме ние
Колку трае една мобилност го одредуваат правилата на Еразмус+ и на Европскиот солидарен корпус и договорот за грант, а не ЕВЕЦ. Кажи ни го периодот што вистински го имаш и ние ќе се движиме околу него — но нема да ти ветиме број што не зависи од нас.
6 · На крајот добиваш потврда и препорака
Не „благодарност“ на е-пошта, туку потпишана потврда и препорака во која пишува што конкретно си правел. Тоа е нешто што се става во биографија и во апликација за факултет или за стипендија.
Што ти останува
Што добиваш на крајот.
Потврда и препорака
Потпишан документ во кој пишува што си правел и колку долго — нешто што вреди во биографија, на факултет и при аплицирање за стипендија.
Работи што навистина излегле
Текст, дизајн, видео или кампања објавени под твое име — не вежба во тетратка, туку нешто што може да се отвори и да се покаже.
Вештини што се учат само во работа
Да застанеш пред група, да организираш настан, да напишеш порака до институција, да работиш со луѓе со попреченост. Ништо од тоа не се учи од предавање.
Луѓе и врски низ Европа
Екипа во пет града кај нас и сестринска организација во Атина. Од тие познанства подоцна излегуваат и размени, и патувања, и работа.
Нешто што остана зад тебе
Исчистен простор, натпревар што се одржал, дете што прв пат фрлило топка на терен. Часовите одат во вистински работи, не во пополнување време.
За родители, наставници и училишта
Ако читате наместо вашето дете или вашиот ученик.
Овој дел е напишан за Вас, а не за нив — со податоците што обично ги барате пред да кажете „оди“.
Кој стои зад ова
Здружение ЕВЕЦ Кочани е граѓанско здружение со ЕМБС 6938566, со седиште во Кочани и со подружници во Штип, Струмица, Делчево и Лозово. Здружението има Ознака за квалитет на Европскиот солидарен корпус, издадена во системот на Европската унија, со важност до 31.12.2027. Тоа значи дека постои надворешна проверка на тоа како работиме со млади луѓе — не е самопрогласен статус.
Безбедност и одговорност
Малолетните лица учествуваат со согласност од родител или старател, а активностите со деца и млади ги водиме според нашата политика за заштита на учесниците. Ако нешто тргне наопаку, постои напишан пат по кој се пријавува и се решава — и тоа не завршува кај лицето што го предизвикало проблемот.
Што добива ученикот
Потврда и препорака за она што вистински го работел, искуство во групна работа и, кај европските програми, документ што се признава надвор од Македонија. Волонтирањето кај нас не е платено и не е замена за работа — тоа е практика, дружење и одговорност.
Ако сте училиште или организација
ЕВЕЦ учествувал во вкупно 17 европски проекти и работи со училишта како партнер во Еразмус+. Ако Ви треба партнер за проект или сакате Вашите ученици да влезат во европска мобилност, најбрзо е да се јавите директно.
Пред да пишеш
Прашања што најчесто ги добиваме.
Ако твоето прашање го нема тука, прати го на contact@evec.org.mk — одговараме лично, а не со шаблон.
Морам ли да имам искуство?
Не. Никој не почнал со искуство. Првиот пат кај сите изгледа исто: доаѓаш на една акција, гледаш како оди и на крајот на денот веќе знаеш што се прави.
Нема тест, нема филтер според биографија и нема потреба да „бидеш активен“ од порано за да те примиме.
Колку време морам да останам?
Кај локалното и онлајн волонтирањето нема пропишано траење — ти кажуваш колку време имаш, ние гледаме што се вклопува. Некој доаѓа на една акција, некој останува со години.
Кај Европскиот солидарен корпус и кај праксата со стипендија од Еразмус+ траењето го одредуваат правилата на програмата и договорот за грант. Ако доаѓаш преку факултет во Македонија или самофинансирано, датумите и обемот ги договараме поединечно. Тоа не се наши правила и не можеме да ги менуваме — затоа на оваа страница нема измислен број на месеци.
Дали волонтирањето е платено?
Не. Локалното и онлајн волонтирањето не се платена работа и не се замена за вработување. ЕВЕЦ нема ниту еден платен вработен — целата организација работи на волонтерска основа.
Кај Европскиот солидарен корпус ситуацијата е поинаква: таму трошоците за пат, сместување и храна ги покрива програмата и добиваш месечен џепарлак — но и тоа не е плата, туку покривање на животот додека волонтираш.
Имам 16 години. Може ли и јас?
Може — локално и онлајн, со согласност од родител или старател. Голем дел од работата и онака се одвива со средношколци и со ученици.
Европскиот солидарен корпус почнува од 18 години; тоа е правило на програмата, не наше. Праксата бара статус на студент: ако студираш во Македонија — самофинансирано или преку практична настава договорена со факултетот; ако доаѓаш од друга земја — со стипендија од Еразмус+ преку установата што те испраќа.
Не сум од Кочани. Има ли нешто за мене?
Има. ЕВЕЦ работи преку подружници во Штип, Струмица, Делчево и Лозово, па „локално“ не значи само Кочани.
Ако си подалеку — на пример студираш во Скопје или си надвор од земјата — останува онлајн волонтирањето, кое воопшто не зависи од тоа каде живееш.
Што ако се запишам, па сфатам дека не ми одговара?
Кажуваш и се повлекуваш. Кај локалното и онлајн волонтирањето нема договор што те врзува и нема казна — единственото што бараме е да не исчезнеш без збор ако некој сметал на тебе тој ден.
Кај Европскиот солидарен корпус и кај праксата има потпишан договор, па прекинот се решава заедно со организациите и со Националната агенција за европски образовни програми и мобилност. И таму има излез, но има и постапка.
Дали сте примиле волонтери од странство досега?
Во Северна Македонија — сè уште не. Ја имаме Ознаката за квалитет како организација домаќин, а бидејќи ознаката ја носи здружението, таа важи за сите пет града — Кочани, Штип, Струмица, Делчево и Лозово. Но досега не сме биле домаќини на волонтер преку Европскиот солидарен корпус.
Го пишуваме ова отворено затоа што ќе го дознаеш и онака. Ако имаш пријател од друга европска земја што сака да дојде овде — тоа е точно она што сакаме да го отвориме.
Како се наоѓа место во странство?
Слободните волонтерски места ги објавува самата програма на Европскиот младински портал. Таму се регистрираш и се пријавуваш кај организацијата чиј оглас ти одговара — местото не ти го „доделува“ ЕВЕЦ.
Она што ЕВЕЦ може да го направи е да те придружува како организација за поддршка. Постапката е разработена на страницата за Европскиот солидарен корпус; ако ти изгледа прегусто, напиши ни и ќе ја поминеме заедно.
Како да проверам дали сте вистинска организација?
Со броеви, не со ветувања. Здружение ЕВЕЦ Кочани има ЕМБС 6938566 во Централниот регистар, а во системот на Европската унија е заведено со OID E10119353 и PIC 943554018, со Ознака за квалитет на Европскиот солидарен корпус со важност до 31.12.2027.
На Европскиот младински портал посебно се заведени три единици — Кочани (OID E10119353), Штип (OID E10039470) и Струмица (OID E10257646). Делчево и Лозово немаат посебен запис на порталот, но се покриени со ознаката на здружението, бидејќи ознаката ја носи здружението како целина.
Имате ли онлајн академија за волонтери?
Сè уште не. Академијата е програма од нашата мрежа што сакаме да ја донесеме и овде, но во Северна Македонија не е започната — затоа на оваа страница намерно нема линк за запишување.
Ако токму тоа го чекаш, напиши ни и ќе те известиме кога ќе се отвори.
Може ли само да дојдам во канцеларија?
Седиштето е на ул. Борис Трајковски 42, 2300 Кочани, но немаме фиксно работно време за странки — екипата честопати е на терен, во училишта и во дневните центри.
Најдобро е прво да пишеш или да се јавиш на 078 275 770, за да те дочека човек што знае да ти одговори токму на твоето прашање.
Сè на оваа страница е или работа што веќе се случува, или план за кој отворено пишува дека е план, или правило што го поставила програмата на Европската унија, или податок што можеш сам да го провериш преку броевите подолу. Ако ти недостига некоја подробност — прашај, ќе добиеш точен одговор или искрено „не знаеме“.
Кому му го даваш времето
Провери нè пред да се одлучиш.
Граѓанско здружение основано во Кочани во 2014 година, со подружници во Штип, Струмица, Делчево и Лозово и со учество во 17 европски проекти. Ознаката за квалитет ја носи здружението, што значи дека важи за сите пет града — иако на Европскиот младински портал посебно се заведени три од нив.
Повеќе за ЕВЕЦ →Ознака за квалитет на ЕСК
организација домаќин и организација за поддршка · важи до 31.12.2027
OID · PIC
E10119353 · 943554018
Провери сам
Здружение
Здружение ЕВЕЦ Кочани · ЕМБС 6938566 · од 2014 · 17 европски проекти · 4 подружници
Сè уште се двоумиш?
Пиши ни — ќе ти кажеме што е отворено за тебе.
Пополни ја кратката пријава — трае една минута. Кажи од кој град си, што те интересира и приближно кога си слободен, а ако имаш прашање напиши го во полето за порака — не мора да си одлучил однапред. Ако повеќе сакаш обична е-порака, и таа важи исто: и пријавата и пораката ги чита човек и одговараме во рок од 3 работни дена, на македонски.
Без обврска · Прашај што билоПријави интерес за волонтирање
Ако повеќе ти одговара обична е-порака, и таа стигнува кај истиот човек. Во неа спомни:
- Име и град — Кочани, Штип, Струмица, Делчево, Лозово или каде и да си
- Колку години имаш (ако имаш под 18, спомни дали родителите знаат)
- Што те интересира: терен, онлајн работа, странство или сè уште не знаеш
- Приближно кога си слободен — колку часа неделно или во кој период
Или јави се на 078 275 770. Одговараме во рок од 3 работни дена.
Одбери го твојот начин — или само кажи здраво.
Е-пошта: contact@evec.org.mk — телефон 078 275 770 (од странство +389 78 275 770)
Седиште: ул. Борис Трајковски 42, 2300 Кочани — јави се или пиши пред да дојдеш, за да те дочека човек. На писмени прашања одговараме во рок од 3 работни дена.
Кофинансирано од Европската унија. Изнесените ставови и мислења се исклучиво на авторите и не мора да ги одразуваат ставовите на Европската унија или на Европската извршна агенција за образование и култура (EACEA). За нив не одговараат ниту Европската унија ниту EACEA.